E situacion di werksternan di Skoa ta continua sin presenta un solucion concreto aunke na october di aña 2021 minister di Enseñansa Endy Croes a sigura na e momento ey, cu den 30 dia lo a mester presenta solucion y conseho, pa esaki Armando “Rudy” Lampe ex-minister di e cartera aki a sigura cu e debe di SKOA mester ta yegando na 20 miyon florin.
Durante un conferencia di prensa reciente minister Croes a afirma cu nan “ta laga e decisionnan aki di hues pa dicidi riba otro proyectonan hunto cu SKOA, pero a traves di ley na e momentonan aki, e veredicto di hues t’ey ainda y ta indica cu werksternan tin cu cobra via explotatie y no den un salario normal cu un payroll, esey ta e caso”, el a sigura cu nan ta trahando riba esey. SKOA a perde dos caso den corte contra ex-minister Lampe
SKOA y 91 werkster a dicidi di hiba ex-minister Armando Rudy Lampe –cu den tempo ey tabata minister di Enseñansa– den dos ocasion dilanti Corte. Den e prome sentencia dia 6 di april 2020, e hues N.K Engelbrecht a rechasa SKOA y e 91 trahado di limpiesa nan peticion, dunando Lampe rason, pa motibo cu SKOA a bay contra ley y a duna e trahadonan di limpiesa e status cu no por, segun ley.
Den e sentencia hues tambe ta indica cu e costo di werksternan tin cu paga via costo di operacion di SKOA y no den e post di personal di SKOA. Akinan SKOA ta basa su mes riba articulo 31 di Landsverordening basisonderwijs (LvBO) cu ta dirigi solamente pa personal di SKOA y no pa werksternan. Segun hues, werksternan ta den servicio di SKOA a base di un contract laboral di e Codigo Civil di Aruba (civielrechtelijke arbeidsovereenkomsten).
Despues di e prome sentencia, SKOA no a cumpli cu e decision di e hues y segun Lampe a confirma na Bon Dia Aruba prome cu su termino como minister a termina na 2021 “te dia di awe nan a sigui paga e werksternan via costo di personal y SKOA ta nenga di haci e cambio”. Den un estado di derecho sano y saludabel, e sentencia di un hues mester wordo cumpli pa cualkier persona y cualkier instancia.
E di dos caso, pa cual hues M. Soffers, a duna sentencia di dia 17 di mei di aña 2021, SKOA ta bolbe hiba Lampe dilanti Corte na unda cu SKOA un biaha mas, a bolbe perde. Hues M. Soffers a referi na e sentencia di dia 6 di april di aña 2020, caminda cu e werksternan mester haya nan pago bao costo di operacion di SKOA.
Lampe den un reciente declaracion na Bon Dia Aruba a sigura cu e unico solucion cu tin ta loke el a bin bisando for di algun tempo “cumpli cu ley, ora nos a descubri cu SKOA a comete un acto contra ley, imagina bo cu ni maske cu bon intencion bo tin, a mi no por coy bo cartera riba caya pa duna un hende cu ta den necesidad, mi mester bo permiso, esey ta considera un robo, aunke e intencion ta bon, SKOA a haci esey, bay contra ley y el a viola nos ley di comptabilidad.”
Igualmente el a conta cu ora cu nan a ripara cu tabatin un cifra cu tabata surpasa 3 miyon florin cu no tabatin autorisacion di parlamento, na final Lampe su persona mester a para responsabel pa e 3 miyon aki si e no a interveni, ta e minister esun cu ta para responsabel pa esey.
Lampe a bisa cu for di 2016 ta bin ta paga e werksternan como ambtenaar mientras cu ley no ta permiti esey, “e ley di subsidio ta hopi cla, werksternan mester haya pago conforme ley di subsidio cu ta bisa cu tur loke ta limpiesa di scol, ta haya un subsidio pa esey bao di e subsidio ey, e salarionan ta cay di e werksternan.”
Esaki ta algo hopi serio segun su opinion, “tanto pa docentenan como pa e werksternan debi cu na e momentonan aki SKOA no ta cumpli cu pago di belasting, pasobra e ta usando placa indebido y en bes di paga belasting e ta paga e werksternan, no tin afdraagd di pension, kiermen cu e ta mal usando placa pa por sigui cover pa añanan e situacion ilegal aki,” Lampe a menciona.
Si nan a coregi e fout aki na 2018, manera Lampe ta sigura “kisas SKOA no ta den situacion financiero aki y pais Aruba no a perde miyones, a mi ta calcula cu e daño aworaki ta riba 20 miyon florin y p’esey minister Endy Croes no por solucion’e pasobra simplemente e tin cu cumpli cu ley y nan ta nenga di haci esey djis pa interes politico, pa evita un conflicto pero mientras tanto e situacion ta birando cada dia pio,” el a finalisa.
Tabata september di aña 2021 cu SKOA a duna un conferencia di prensa indicando cu nan tabata confia cu gobierno nobo -na e tempo ey- lo trece un solucion pa e werskternan.
Personalmente Responsabel (persoonlijke aansprakelijkheid)
Mientras tanto, preguntanan ta sigui keda pa loke ta trata werksternan cu tambe lo mester haya contesta, pero ta ken lo para responsabel pa e cantidad di placa cu segun Lampe a sigura, na e momentonan aki ta rond di 20 miyon florin y ki dia lo presenta conseho y solucion concreto?
Di otro banda, den un declaracion Anuesca Baly director di SKOA, di dia 5 di februari di aña 2020, el a declara publicamente cu SKOA tabata basa su maneho di pago di trahadonan di limpiesa riba decreto ministerial di 2015 di ex-minister Hooyboer.
Ta importante pa destaca cu dia 6 di april 2020 hues a dicta sentencia unda e decreto ministerial cu SKOA ta basa su maneho riba dje no tin ningun peso huridico y SKOA no a cumpli cu e sentencia, 17 di mei 2021 hues ta bolbe dicta un otro sentencia y pa di dos biaha SKOA no ta cumpli cune. Ex-minister Lampe como minister di enseñansa na e momento ey, a manda carta pa SKOA pa regla e situacion di pago di werksternan pa cuminsa paga nan via costo di operacion di SKOA tampoco no a cumpli.
Segun buki 2:14 di Codigo Civil den su articulo 14 ta regla e responsabilidad di un director di un fundacion na unda cu si conscientemente of structuralmente e pone e fundacion den un problema financiero of si e actua contra ley, e lo por poni personalmente responsabel (persoonlijke aansprakelijk).