Un sentimento di alivio y victoria ta loke cu e candidato di partido RED Kinsasha van der Bliek a sinti, despues di un aña sperando riba decision di corte cu finalmente a yega.
Den conferencia di prensa van der Bliek a elabora riba e decision di corte relaciona cu su retiro condicional cu el a haya for di gobierno. Su salud mental na final a pone cu el a tuma su retiro boluntario.
“Mi ta contento cu e decision di corte pasobra mi ta sinti cu nos a logra un victoria. Na mes momento ta keda pendiente, mirando e mentalidad politico di e pais aki, pa cualkier otro pasonan cu nan por tuma contra partido.”
Gobierno a dicidi di dun’e su retiro condicional ora cu el a aparece riba Facebook ta cende un joint (sigaria di marihuana) durante un LIVE.
Den e conferencia nan a splica un parti di contenido di e decision di corte unda ta menciona cu gobierno su decision pa retira van der Bliek si e comete un infraccion den e proximo dos añanan ta desproporcional.
A bisa cu gobierno mester a mira e situacion cu un otro bril. A bisa cu Kinsasha van der Bliek den su calidad di candidato di partido RED Democratico, cu tin como punto di campaña legalisacion di uzo recreacional di cannabis, tin derecho di expresion. E derecho aki di van der Bliek no por wordo limita ni pasobra e ta un funcionario publico.