Ex-minister di Enseñansa Rudy Lampe no a gusta pa nada cu e actual Minister di Enseñansa a yama su colega di partido (Rene Kock) un chabelito manda. El a considera esaki un insulta pasobra ta trata di un profesional diploma den enseñansa.
E ta bisa esaki pasobra si e haci un comparacion entre Rene Kock y e actual mandatario, e no por keda sin bisa cu ta aki na Aruba so Endy Croes por a bira Minister, “Na otro pais bo mester tin un formacion academico of bo mester ta un profesional diploma den educacion pa bira Minister di Educacion. Pero na Aruba tur cos ta posibel.”
Lampe a recorda cu ta su persona, como Minister di Educacion, a inicia e proceso pa coregi foutnan den Dienst Publieke Scholen Z(DPS). “Awo e Minister ta haci manera cu mi no a haci nada y cu ta el a haci tur e trabou. Awe mi a bini cu documento pa proba su mentiranan.”
Den e documentonan di traspaso entrega por lesa na pagina 8 cu ta papia di e organisacion DPS. Specificamente ta papia di intervencion di Departamento di Recurso Humano (DRH) na DPS. Por lesa cu eynan tabatin deficiencia serio y bottlenecks, den asunto di personal. Y e coreccionnan aki ta den ehecucion.” Hasta el a bisa e mandatario cu e erornan t’asina grave cu e ta haci un apelacion na dje pa sigui cu e plan pa drecha e problemanan aki.
Ta for di 2019 a tuma nota di e problemanan aki unda cu ambtenaar y docentenan pa añas ta trahando y no ta registra na APFA. A atende e problema aki for di di 2019, ora cu a papia cu DRH. Na maart 2020 a entrega na DRH un lista cu 55 nomber di docente, kendenan no tabata registra na APFA. Na 2021 a manda pa DRH y DPS un carta cu peticion pa atende cu e problema y sigui e conseho di DRH pa busca e solucion pa tur e deficiencianan indica.
Rudy Lampe ta kere cu loke Endy Croes ta haci awor ta un strategia di Marketing pa pinta su persona malo den e asunto di DPS, pa kita atencion. Pasobra na final, e ta bisa, e lo haya rason cu independisacion di DPS. Pero awo kier bisa cu a haci un mal trabou.
Croes den su conferencia a menciona cu a haci uzo di servicio di un consultant cu lo bini cu un organogram nobo pa DPS. “Door cu Hulanda ta pone riba mesa, nan mester haci’e. Ora cu un profesional Arubiano a bini cu e plan ta bisa no, pero awo nan tin cu haci’e riba ordo di Hulanda.”
Si na 2018 tabatin un Parlamento cu sentido comun pa apoya su plan (di Lampe), lo no ta den e problema di DPS. “A perde cinco aña pasobra ta pone politico den Parlamento cu no ta uza nan sentido comun y ta bay pa motibonan politico di voto, a corto plaso y ta worry solamente cu interes di partido. A vota contra e plan di RED pa kibra e partido. Un mal decision a wordo tuma mas cu cinco aña pasa. Y esey ta tur loke tin tras di e declaracion di Minister Endy Croes siman pasa.” Click link pa lesa mas: https://24ora.news/475PZYY