Rudy Lampe, miembro di Partido RED Democratico a toca riba e sentencia den e caso di SKOA cu werksternan di siman pasa unda hues ta bisa cu gobierno di Aruba na April 2022, despues di gaña SKOA y werksternan ora a manda email un dia prome cu eleccion bisando cu nan lo regla e asunto di werskternan.
E minister nobo di enseñansa, Endy Croes, a bisa tambe cu den un luna lo por drecha e situacion aki. Awor, den e sentencia ta para na april 2022, Evelyn Wever-Croes ta comunica cu SKOA y bisa cu tin cu cumpli cu ley manera Lampe a indica, y SKOA mester a bay bek na e werksternan pa splica e situacion. P’esey tabata tin un caso tras di otro pasobra werksternan a haya un mentira cu nan lo tin status di ambtenaar.
SKOA TA IRESPONSABELMinister-president a bisa cu e lo regla e asunto y despues a bini cu e tabata un mentira. SKOA a bin den su defensa bisando cu gobierno den tempo di gabinete Eman tambe a bisa cu lo regla esaki p’e werksternan haya status di ambtenaar, contra ley.
Nan a cuminsa ehecuta esaki y uza placa di pueblo contra ley. Hues ta bisa nan cu SKOA ta doño di trabao, no Land Aruba. Un bon doño di trabao ta actua responsabel, dus con por a permiti pa nan sigui mentira pa medio di MEP y AVP, dicon SKOA mes no por a bay wak cu e cos ta contra ley. Tabata tin un mocion di parlamento tambe pa saca placa di pueblo contra ley p’e werksternan.
“P’esey hues a baha riba SKOA bisando cu nan ta iresponsabel como doño di trabao pasobra no a sigui busca pa sa mas. Y den e sentencia nos ta mira – y esey ta un caso tristo con Evelyn Wever-Croes a hundi SKOA,” segun Lampe ta expresa. Partido RED Democratico na 2019 a propone na SKOA pa bin cu solucion. Sugeri pa bin sinta na mesa cu werkster y paga nan derecho adkiri, y nan ta keda cu nan trabao, sin SKOA mester tin problema financiero. Pero Evelyn Wever-Croes a gaña cu nan si lo bay regla esaki. SKOA a bay uza placa di impuesto pa tapa e buraco ey.
Hues a bisa den sentencia siman pasa cu na september 2022 SKOA ta debe mas di 6 miyon florin na impuesto, cu minister-president a hinca nan den e problema aki. SKOA ta bisa hues cu nan no por paga. Impuesto ta bay over na of pone beslag di SKOA of ta bin un acuerdo di pago, pero kwijtschelding e no por duna pasobra lo para personalmente responsabel p’e suma ey cu placa di pueblo. P’esey Lampe mester a actua ora a descubri esaki na 2018, si e no lo a actua ta Lampe mes lo mester a para personalmente responsabel pa 3 miyon florin. “Kiermen mi mester a actua y bin cu solucion pa yuda SKOA, pero nan no tabata reuni cu mi mas den cocolishi. E tabata reuni cu minister-president pasobra e si lo soluciona anto wak unda nan ta sinta aworaki.”
UN TA TIRA CULPA RIBA OTROHues a bay mas leu den e sentencia: aworaki ta pidi werkster pa haci sacrificio, pero que hubo si directora di SKOA cu tin salario halto. Lo ta bon p’e docentenan di SKOA bay corta den nan salario pa asina regla e asunto aki causa pa actua contra ley y cu bendicion di minister-president cu a gaña hende. “Na final di sentencia hues ta bisa cu awor SEPPA y SKOA ta tira culpa riba otro,asina ta para den sentencia.”
Nos tur por corda con SEPPA a bin cu e trahadonan te na Bestuurskantoor pa manifesta y insulta sr. Lampe cu ta el a causa e problema aki, anto awor cu e baca a hoga un ta tira culpa riba otro. Lampe: “P’esey ta hopi tristo realmente con nos minister-president a gaña den e caso aki, y perhudica werksternan. A gaña SKOA tambe, y berdad pais Aruba a perde. Pasobra a uza placa contra ley, y p’esey nos ta mira awor e mesun modus operandi den otro casonan.”